Молитвенник
На церковно-славянском языке
Во имя Отца, и Сына, и Святаго Духа. Аминь.
Молитва мытаря: Боже, милостив буди мне, грешному.
Господи Iисусе Христе, Сыне Божiй, молитв ради Пречистыя Твоея Матере и всех святых, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прiиди и вселися в ны, и очисти ны от всякiя скверны, и спаси, Блаже, душы наша.
Святый Боже, Святый крепкiй, Святый безсмертный, помилуй нас (трижды).
Слава Отцу, и Сыну, и Святому Духу, и ныне и присно, и во веки веков. Аминь.
Пресвятая Троице, помилуй нас: Господи, очисти грехи наша, Владыко, прости беззаконiя наша, Святый, посети и исцели немощи наша имене Твоего ради.
Господи, помилуй (трижды).
Слава Отцу, и Сыну, и Святому Духу, и ныне и присно, и во веки веков. Аминь.
Отче наш, Иже еси на небесех! Да святится имя Твое, да прiидет Царствiе Твое: да будет воля Твоя, яко на небеси и на земли. Хлеб наш насущный даждь нам днесь, и остави нам долги наша, якоже и мы оставляем должником нашим, и не введи нас во искушенiе, но избави нас от лукаваго.
Яко Твое есть Царство, и сила, и слава, Отца, и Сына, и Святаго Духа, ныне и присно, и во веки веков. Аминь.
Молитвы Утреннiя
После начальных молитв читай следующiе молитвы.
Тропари Троичны:
Воставше от сна, припадаем Ти, Блаже, и ангельскую песнь вопiем Ти, Сильне: Свят, Свят, Свят еси, Боже, Богородицею помилуй нас.
Слава Отцу, и Сыну, и Святому Духу. От одра и сна воздвигл мя еси, Господи, ум мой просвети и сердце, и устне мои отверзи, во еже пети Тя, Святая Троице, Свят, Свят, Свят еси, Боже, Богородицею помилуй нас.
И ныне и присно и во веки веков, аминь. Внезапу Судiя прiидет, и коегождо деянiя обнажатся, но страхом зовем в полунощи: Свят, Свят, Свят еси, Боже, Богородицею помилуй нас.
Господи, помилуй (12).
Молитва
От сна востав, благодарю Тя, Святая Троице, яко многiя ради Твоея благости и долготерпенiя не прогневался еси на мя, лениваго и грешнаго, ниже погубил мя еси со беззаконьми моими: но человеколюбствовал еси обычно, и в нечаянiи лежащаго воздвигл еси, во еже утреневати и славословити державу Твою. И ныне просвети мои очи мысленныя, отверзи моя уста поучатися словесем Твоим,и разумети заповеди Твоя, и творити волю Твою, и пети Тя во исповеданiи сердечнем, и воспевати всесвятое имя Твое, Отца, и Сына, и Святаго Духа, ныне и присно, и во веки веков, аминь.
Прiидите, поклонимся Цареви нашему Богу.
Прiидите, поклонимся и припадем Христу, Цареви нашему Богу
Прiидите, поклонимся и припадем Самому Христу, Цареви и Богу нашему.
Боже, очисти мя грешнаго, яко николиже сотворих благое пред Тобою, но избави мя от лукаваго и да будет во мне воля Твоя: да не осужденно отверзу уста моя недостойная и восхвалю имя Твое Святое, Отца, и Сына, и Святаго Духа, ныне, и присно, и во веки веков, аминь.
Молитва того же святаго
От сна востав, полунощную песнь приношу Ти, Спасе, и припадая вопiю Ти: не даждь ми уснути во греховней смерти, но ущедри мя, распныйся волею, и лежащаго мя в лености ускорив возстави, и спаси мя в предстоянiи и молитве: и по сне нощнем возсiяй ми день безгрешен, Христе Боже, и спаси мя.
Молитва того же святаго
К Тебе, Владыко Человеколюбче, от сна востав прибегаю, и на дела Твоя подвизаюся милосердiем Твоим, и молюся Тебе: помози мне на всякое время, во всякой вещи, и избави мя от всякiя мирскiя злыя вещи и дiавольскаго поспешенијя, и спаси мя, и введи в Царство Твое вечное. Ты бо еси мой Сотворитель и всякому благу Промысленник и Податель, о Тебе же все упованiе мое, и Тебе славу возсылаю, ныне, и присно, и во веки веков. Аминь.
Молитва того же святаго
Господи, иже многою Твоею благостiю и великими щедротами Твоими, дал еси мне рабу Твоему мимошедшее время нощи сея без напасти прейти от всякаго зла противна: Ты Сам, Владыко, всяческих Творче, сподоби мя истинным Твоим светом и просвещенным сердцем творити волю Твою, ныне, и присно, и во веки веков, аминь.
Молитва св. Василiя Великаго
Господи Вседержителю, Боже сил и всякiя плоти, в вышних живый и на смиренные призираяй, сердца же и утробы испытуяй и сокровенная человеков яве предведый, Безначальный и Присносущный Свете, у Негоже несть премененiя, или преложенiя осененiе: Сам, Безсмертный Царю, прiими моленiя наша, яже в настоящее время, на множество Твоих щедрот дерзающе, от скверных к Тебе устен творим, и остави нам прегрешенiя наша, яже делом, и словом, и мыслiю, веденiем или неведенiем, согрешенная нами; и очисти ны от всякiя скверны плоти и духа. И даруй нам бодренным сердцем и трезвенною мыслiю всю настоящаго житiя нощь прейти, ожидающым пришествыя светлаго и явленнаго дне Единароднаго Твоего Сына, Господа и Бога и Спаса нашего Iисуса Христа, в оньже со славою Судiя всех прiидет, комуждо воздати по делом его: да не падше и обленившеся, но бодрствующе и воздвижени в деланiе, обрящемся готови, в радость и Божественный чертог славы Его совнидем, идеже празднующих глас непрестанный и неизреченная сладость зрящих Твоего лица доброту неизреченную. Ты бо еси истинный Свет, просвещаяй и освящаяй всяческая, и Тя поет вся тварь во веки веков, аминь.
Молитва св. Василiя
Тя благословим, вышнiй Боже, и Господи милости, творящего присно с нами великая же и неизследованная, славная же и ужасная, их же несть числа, подавшаго нам сон во упокоенiе немощи нашея, и ослабленiе трудов многотрудныя плоти. Благодарим Тя, яко не погубил еси нас со беззаконьми нашими, но человеколюбствовал еси обычно, и в нечаянiи лежащыя ны воздвигл еси, во еже славословити державу Твою. Тем же молим безмерную Твою благость: просвети нашя мысли, очеса, и ум наш от тяжкаго сна лености возстави, отверзи наша уста, и исполни я Твоего хваленiя, яко да возможем непоколеблемо пети же и исповедатися Тебе, во всех и от всех славимому Богу, безначальному Отцу, со единородным Твоим Сыном, и всесвятым, и благим и животворящим Твоим Духом, ныне и присно, и во веки веков. Аминь.
Молитва ко Пресвятой Владычице
Воспеваю благодать Твою, Владычице, молю Тя, ум мой облагодати. Ступати право мя настави, путю Христовых заповедей. Бдети к песни укрепи, унынiя сон отгоняющи. Связана пленицами грехопаденiй мольбами Твоими разреши, Богоневесто. В нощи мя и во дни сохраняй, борющих враг избавляющи мя. Жизнодателя Бога рождшая, умерщвлена мя страстьми оживи. Яже Свет невечернiй рождшая, душу мою ослепшую просвети. О дивная Владычня палато, дом Духа Божественна мене сотвори. Врача рождшая, уврачуй души моея многолетныя страсти. Волнующася житейскою бурею, ко стези мя покаянiя направи. Избави мя огня вечнующаго, и червiя же злаго, и тартара. Да мя не явиши бесом радованiе, иже многим грехом повинника.
Нова сотвори мя, обетшавшаго нечувственными, Пренепорочная, согрешенiи. Странна муки всякiя покажи мя, и всех Владыку умоли. Небесная ми улучити веселiя со всеми святыми сподоби. Пресвятая Дево, услыши глас непотребнаго раба Твоего. Струю давай мне слезам, Пречистая, души моея скверну очищающи. Стенанiя от сердца приношу Ти непрестанно, усердствуй Владычице. Молебную служюу мою прiими, и Богу благоутробному принеси. Превышшая ангел, мирскаго мя превышша слитiя сотвори. Светоносная сене небесная, духовную благодать во мне направи. Руце воздею и устне к похваленiю, осквернены скверною, Всенепорочная. Душетленных мя пакостей избави, Христа прилежно умоляющи: Емуже честь и поклоненiе подобает, ныне и присно, и во веки веков, аминь.
Молитва ко Господу нашему Iисусу Христу
Многомилостиве и всемилостиве Боже мой, Господи Iисусе Христе, многiя ради любве сшел и воплотился еси, яко да спасеши всех: и паки, Спасе, спаси мя по благодати, молю Тя. Аще бо от дел спасеши мя, несть се благодать и дар, но долг паче. Ей, Многiй в щедротах, и неизреченный в милости! Веруяй бо в Мя, рекл еси, о Христе мой, жив будет и не узрит смерти во веки.
Аще убо вера, яже в Тя, спасает отчаянныя, се верую, спаси мя, яко Бог мой еси Ты и Создатель. Вера же вместо дел да вменится мне, Боже мой: не взыщеши бо дел отнюдь оправдающих мя. Но та вера моя да довлеет вместо всех, та да отвещает, та да оправдит мя, та да покажет мя причастника славы Твоея вечныя, да не убо похитит мя сатана и похвалится, Слове, еже отторгнути мя от Твоея руки и ограды. Но или хощу, спаси мя, или не хощу, Христе Спасе мой, предвари скоро, скоро, погибох: Ты бо еси Бог мой от чрева матере моея. Сподоби мя, Господи, ныне возлюбити Тя, якоже возлюбих иногда той самый грех, и паки поработати Тебе без лености тощно, якоже поработах прежде сатане льстивому. Наипаче же поработаю Тебе, Господу и Богу моему Iисусу Христу, во вся дни живота моего, ныне и присно, и во веки веков, аминь.
Молитва ко св. Ангелу Хранителю:
Святый Ангеле, предстояй окаянней моей души и страстней моей жизни, не остави мене грешнаго, ниже отступи от мене за невоздержанiе мое: не даждь место лукавому демону обладати мною насильством смертнаго сего телесе: укрепи бедствующую и худую мою руку и настави мя на путь спасенiя. Ей, святый Ангеле Божiй, хранителю и покровителю окаянныя моея души и тела, вся мне прости, еликими тя оскорбих во вся дни живота моего, и аще что согреших в прешедшую нощь сiю, покрый мя в настоящiй день, и сохрани мя от всякаго искушенiя противнаго, да ни в коем гресе прогневаю Бога, и молися за мя ко Господу, да утвердит мя в страсе Своем, и достойна покажет мя раба Своея благости, аминь.
Другая молитва: Ангеле Божiй, хранителю мой святый, на соблюденiе мне от Бога с небесе данный. Ты мя днесь просвети, от всякаго зла сохрани, ко благому деянiю настави и на путь спасенiя направи, аминь.
Молитва ко Пресвятей Богородице:
Пресвятая Владычице моя Богородице, святыми Твоими и всесильными мольбами отжени от мене смиреннаго и окаяннаго раба Твоего, унынiе, забвенiе, неразумiе, нераденiе, и вся скверная, лукавая и хульная помышленiя, от окаяннаго моего сердца и от помраченнаго ума моего: и погаси пламень страстей моих, яко нищь есмь и окаянен, и избави мя от многих и лютых воспоминанiй и предпрiятий, и от всех действ злых свободи мя: яко благословена еси от всех родов, и славится пречестное имя Твое во веки веков, аминь.
Молитва к Святаму, его же имя носиши
Моли Бога о мне, святый угодниче Божiй (имя), яко аз усердно к тебе прибегаю, скорому помощнику и молитвеннику о душе моей.
Песнь Пресвятой Богородице:
Богородице Дево, радуйся, Благодатная Марiе, Господь с Тобою: благословенна ты в женах и благословен Плод чрева Твоего, яко Спаса родила еси душ наших.
Тропарь креста и молитва за отечество:
Тропарь Кресту
Спаси, Господи, люди Твоя и благослови достоянiе Твое, победы православным христiанам на сопротивныя даруя, и Твое сохраняя крестом Твоим жительство.
Молитва о спасенiи Россiи
Господи, Iисусе Христе, Боже наш, прости беззаконiя наша. Молитвами Пречистыя Твоея Матере, спаси страждущiи Россiйскiя люди от ига безбожныя власти. Аминь.
Достойно есть, яко во истину, блажити Тя, Богородицу, присноблаженную и пренепорочную, и Матерь Бога нашего. Честнейшую херувим и славнейшую без сравненiя серафим, без истленiя Бога–Слова рождшую, сущую Богородицу, Тя величаем.
Молитва последних Оптинских старцев
Господи, дай мне с душевным спокойствiем встретить все, что принесет мне наступающiй день. Дай мне всецело предаться воле Твоей святой. На всякiй час сего дня во всем наставь и поддержи меня. Какiя бы я ни получал известiя в теченiи дня, научи меня принять их со спокойной душой и твердым убежденiем, что на все святая воля Твоя. Во всех словах и делах моих руководи моими мыслями и чувствами. Во всех непредвиденных случаях не дай мне забыть, что все ниспослано Тобой. Научи меня прямо и разумно действовать с каждым членом семьи моей, никого не смущая и не огорчая. Господи, дай мне силу перенести утомленiе наступающаго дня и все событiя в теченiе дня. Руководи моею волею и научи меня молиться, верить, надеяться, терпеть, прощать и любить. Аминь.
продолженiи дня
Молитва перед едой: “Отче наш.”
Молитва после еды: Благодарим Тя, Христе Боже наш, яко насытил еси нас земных Твоих благ: не лиши нас и Небеснаго Твоего Царствiя.
Молитвы перед ученiем
Преблагiй Господи! Низпосли нам благодать Духа Твоего Святаго, дарствующаго и укрепляющаго душевныя нашя силы, дабы внимающе преподаваемому нам ученiю, возрасли мы Тебе нашему Создателю во славу, родителем же нашим на утешенiе, Церкви и отечеству на пользу.
Молитва перед началом всякаго дела
Господи Iисусе Христе, Сыне Единородный Безначальнаго Твоего Отца, Ты рекл еси пречистыми усты Твоими: яко без Мене не можете творити ничесоже. Господи мой, Господи, верою объем в души моей и сердце Тобою реченная, припадаю Твоей благости: помози ми грешному сiе дело, мною начинаемое, о Тебе Самом совершити, во имя Отца и Сына и Святаго Духа. Аминь.
Вечернiя молитвы
После начальных молитв читай.
Тропари
Помилуй нас, Господи, помилуй нас: всякаго бо ответа недоумеюще, сiю Ти молитву яко Владыце грешнiи приносим: помилуй нас.
Слава Отцу, и Сыну, и Святому Духу. Господи, помилуй нас, на Тя бо уповахом, не прогневайся на ны зело, ниже помяни беззаконiй наших: но призри и ныне яко благоутробен, и избави ны от враг наших, Ты бо еси Бог наш, и мы людiе Твои, вси дела руку Твоею, и имя Твое призываем.
И ныне и присно, и во веки веков. Аминь. Милосердiя двери отверзи нам, благословенная Богородице, надеющiися на Тя да не погибнем, но да избавимся Тобою от бед: Ты бо еси спасенiе рода христiанскаго.
Господи, помилуй (12).
Молитва св. Макарiя Великаго
Боже вечный и Царю всякаго созданiя, сподобивый мя даже в час сей доспети, прости ми грехи, яже сотворих в сей день делом, словом и помышленiем, и очисти, Господи, смиренную мою душу от всякiя скверны плоти и духа. И даждь ми, Господи, в нощи сей сон прейти в мире, да востав от смиреннаго ми ложа, благоугожду пресвятому имени Твоему, во вся дни живота моего и поперу борющыя мя враги плотскiя и безплотныя. И избави мя, Господи, от помышленiй суетных, оскверняющих мя, и похотей лукавых. Яко Твое есть Царство, и сила, и слава, Отца, и Сына, и Святаго Духа, ныне, и присно, и во веки веков. Аминь.
Молитва св. Антiоха
Вседержителю, Слово Отчее, Сам совершен сый, Iисусе Христе, многаго ради милосердiя Твоего никогдаже отлучайся мене раба Твоего, но всегда во мне почивай. Iисусе, добрый Пастырю Твоих овец, не предаждь мене крамоле змiине и желанiю сатанину не остави мене: яко семя тли во мне есть. Ты убо, Господи Боже поклоняемый, Царю Святый, Iисусе Христе, спяща мя сохрани немерцающим светом, Духом Твоим Святым, Имже освятил еси Твоя ученики. Даждь, Господи, и мне, недостойному рабу Твоему, спасенiе Твоего на ложи моем, просвети ум мой светом разума святаго Евангелiя Твоего, душу любовiю креста Твоего, сердце чистотою словесе Твоего, тело мое Твоею страстiю безстрастною, мысль мою Твоим смиренiем сохрани, и воздвигни мя во время подобно на Твое славословiе. Яко препрославлен еси со безначальным Твоим Отцем и с Пресвятым Духом во веки. Аминь
Молитва Святому Духу
Господи, Царю небесный, Утешителю, Душе истины, умилосердися и помилуй мя грешнаго раба Твоего, и отпусти ми недостойному, и прости вся елика ти согреших днесь, яко человек, паче же и не яко человек, но и горее скота: вольныя моя грехи и невольныя, ведомыя и неведомыя, яже от юности и от науки злы, и еже суть от нагльства и унынiя. Аще именем Твоим кляхся, или похулих е в помышленiи моем, или кого укорих, или оклеветах кого гневом моим, или опечалих, или о чем прогневахся, или солгах, или безгодно спах, или нищ прiиде ко мне, и презрех его, или брата моего опечалих, или свадих, или кого осудих, или развеличахся, или разгордехся, или разгневахся, или стоящу ми на молитве, ум мой о лукавствiи мира сего подвижеся, или развращенiе помыслих, или объядохся, или опихся, или без ума смеяхся, или доброту чуждую видев, и тою уязвен бых сердцем, или неподобная глаголах, или греху брата моего посмеяхся, моя же суть безчисленная согрешенiя, или о молитве нерадих, или иное что содеяв лукавое, не помню, та бо вся и больша сих содеях. Помилуй мя, Творче мой, Владыко, унылаго и надостойнаго раба Твоего: и остави ми, и отпусти, и прости мя, яко благ и человеколюбец, да с миром лягу, усну и почiю, блудный, грешный и окаянный аз, и поклонюся, и воспою, и прославлю пречестное имя Твое со Отцем, и единородным Его Сыном, ныне, и присно, и во веки. Аминь.
Молитва св. Макарiя Великаго
Что Ти принесу? Или что Ти воздам, великодаровитый безсмертный Царю, щедре и человеколюбче Господи? Яко ленящася мене на Твое угожденiе, и ничтоже благо сотворша, привел еси на конец мимошедшаго дне сего, обращенiе и спасенiе души моей строя. Милостив буди ми, грешному и обнаженному всякаго дела блага, возстави падшую мою душу, осквернившуюся в безмерных согрешенiях, и отими от мене весь помысл лукавый видимаго сего житiя. Прости моя согрешенiя, едине безгрешне, яже Ти согреших в сей день, веденiем и неведенiем, словом, и делом, и помышленiем, и всеми моими чувствы. Ты сам, покрывая, сохрани мя от всякаго сопротивнаго обстоянiя Божественною Твоею властiю и неизреченным человеколюбiем и силою. Очисти, Боже, очисти множество грехов моих. Благоволи, Господи, избавити мя от сети лукаваго, и спаси страстную мою душу, и осени мя светом лица Твоего, егда прiидеши во славе, и неосужденна ныне сном уснути сотвори, и без мечтанiя, и не смущен помысл раба Твоего соблюди, и всю сатанину детель отжени от мене, и просвети ми разумныя очи сердечныя, да не усну в смерть. И посли ми Ангела мирна, хранителя и наставника души и телу моему, да избавит мя от враг моих, да, востав со одра моего, принесу Ти благодарственныя мольбы.
Ей, Господи, услыши мя, грешнаго и убогаго раба Твоего, изволенiем и совестью: даруй ми воставшу словесем Твоим поучитися, и унынiе бесовское далече от меня отгнано быти сотвори Твоими ангелы: да благословлю имя Твое святое, и прославлю, и славлю пречистую Богородицу Марiю, Юже дал еси нам, грешным, заступленiе, и прiими Сiю, молящуюся за ны. Вем бо, яко подражает Твое человеколюбiе, и молящися не престает. Тоя заступленiем и честнаго Креста знаменiем, и всех святых Твоих ради, убогую душу мою соблюди, Iисусе Христе, Боже наш, яко свят еси, и препрославлен во веки. Аминь.
Молитва
Господи Боже наш, еже согреших во дни сем словом, делом и помышленiем, яко благ и Человеколюбец прости ми. Мирен сон и безмятежен даруй ми: Ангела Твоего хранителя посли, покрывающа и соблюдающа мя от всякаго зла, яко Ты еси хринитель душам и телесем нашым, и Тебе славу возсылаем, Отцу, и Сыну, и Святому Духу, ныне и присно, и во веки веков. Аминь.
Молитва
Господи Боже наш, в Негоже веровахом, и Егоже имя паче всякаго имене призываем, даждь нам, ко сну отходящим, ослабу души и телу, и соблюди нас от всякаго мечтанiя, и темныя сласти кроме: устави стремленiе страстей, угаси разжженiе востанiя телеснаго, даждь нам целомудренне пожити делы и словесы, да добродетельное жительство воспрiемлюще, обетованных не отпадем благих Твоих, яко благословен еси во веки. Аминь.
Молитва св. Iоанна Златоуста
Господи, не лиши мене небесных Твоих благ. Господи, избави мя вечных мук. Господи, умом ли или помышленим, словом или делом согреших, прости мя. Господи, избави мя всякаго неведенiя, и забвенiя, и малодушiя, и окамененнаго нечувствiя. Господи, избави мя от всякаго искушенiя. Господи, просвети мое сердце, еже помрачи лукавое похотенiе. Господи, аз яко человек согреших, Ты же, яко Бог щедр, помилуй мя, видя немощь души моея. Господи, посли благодать Твою в помощь мне, да прославлю имя Твое Святое. Господи Iисусе Христе, напиши мя раба Твоего в книзе животней и даруй ми конец благiй. Господи Боже мой, аще и ничтоже благо сотворих пред Тобою, но даждь ми по благодати Твоей положити начало благое. Господи, окропи в сердцы моем росу благодати Твоея. Господи небесе и земли, помяни мя грешнаго раба Твоего, студнаго и нечистаго, во Царствiи Твоем. Аминь.
Господи, в покаянiи прiими мя. Господи, не остави мене. Господи, не введи мене в напасть. Господи, даждь ми мысль благу. Господи, даждь ми слезы, и память смертную, и умиленiе. Господи, даждь ми помысл исповеданiя грехов моих. Господи, даждь ми смиренiе, целомудрiе и послушанiе. Господи, даждь ми терпенiе, великодушiе и кротость. Господи, всели в мя корень благих, страх Твой в сердце мое. Господи, сподоби мя любити Тя от всея души моея и помышленiя и творити во всем волю Твою. Господи, покрый мя от человек некоторых, и бесов, и страстей, и от всякiя иныя неподобныя вещи. Господи, веси, яко твориши, якоже Ты волиши, да будет воля Твоя и во мне грешнем, яко благословен еси во веки. Аминь.
Молитва ко Господу нашему Iисусу Христу
Господи Iисусе Христе, Сыне Божiй, ради честнейшiя Матере Твоея, и безплотных Твоих ангел, пророка же и Предтечи и Крестителя Твоего, богоглаголивых же Апостол, светлых и добропобедных мученик, преподобных и богоностных отец, и всех святых молитвами избави мя настоящего обстоянiя бесовскаго. Ей, Господи мой и Творче, не хотяй смерти грешнаго, но якоже обратитися и живу быти ему, даждь и мне обращеiе окаянному и недостойному; изми мя от уст пагубнаго змiя, зiяющаго пожрети мя и свести во ад жива. Ей, Господи мой, утешенiе мое, Иже мне ради окаяннаго в тленную плоть оболкiйся, исторги мя от окаянства, и утешеннiе подождь души моей окаянней. Всади в сердце мое творити Твоя повеленiя, и оставити лукавая деянiя, и получити блаженства Твоя: на Тя бо, Господи, уповах, спаси мя.
Молитва ко Пресвятой Богородице
Благаго Царя благая Мати, Пречистая и Благословенная Богородице Марiе, милость Сына Твоего и Бога нашего излей на страстную мою душу и Твоими молитвами настави мя на деянiя благая, да прочее время живота моего без порока прейду и Тобою рай да обрящу, Богородице Дево, Едина чистая и благословенная.
Молитва ко святому Ангелу Хранителю
Ангеле Христов, хранителю мой святый и покровителю души и тела моего, вся ми прости, елика согреших во днешнiй день, и от всякаго лукавствiя противнаго ми врага избави мя, да ни в коемже гресе прогневаю Бога моего: но моли за мя грешнаго и недостойнаго раба, яко да достойна мя покажеши благости и милости Всесвятыя Троицы и Матере Господа моего Iисуса Христа и всех святых. Аминь.
Кондак Богородице
Взбранной Воеводе победительная, яко избавльшеся от злых, благодарственная восписуем Ти раби Твои, Богородице: но яко имущая державу непобедимую, от всяких нас бед свободи, да зовем Ти: радуйся, Невесто Неневестная.
Преславная Приснодево, Мати Христа Бога, принеси нашу молитву Сыну твоему и Богу нашему, да спасет Тобою души наша.
Все упованiе мое на Тя возлагаю, Мати Божiя, сохрани мя под кровом Твоим.
Богородицце Дево, не презри мене грешнаго, требующа Твоея помощи и Твоего заступленiя: на Тя бо упова душа моя, и помилуй мя.
Упованiе мое Отец, прибежище мое Сын, покров мой Дух Святый, Троице Святая, слава Тебе.
Богородице Дево, радуйся, Благодатная Марiе, Господь с Тобою: благословенна Ты в женах и благословен Плод чрева Твоего, яко Спаса родила еси душ наших.
Достойно есть, яко воистину, блажити Тя Богородицу, присноблаженную и пренепорочную и Матерь Бога нашего. Честнейшую херувим и славнейшую без сравненiя серафим, без истленiя Бога Слова рождшую, сущую Богородицу Тя величаем.
Слава Отцу, и Сыну, и Святому Духу, и ныне и присно, и во веки веков. Аминь.
Господи, помилуй (трижды). Господи, благослови. И отпуст:
Господи Iисусе Христе, Сыне Божiй, молитв ради Пречистыя Твоея Матери, преподобных и Богоносных отец наших и всех святых, помилуй нас. Аминь.
*** *** ***
Дополнительные вечерние молитвы
Молитва св. Iоанна Дамаскина
Владыко Человеколюбче, неужели мне одр сей гроб будет; или еще окаянную мою душу просветиши днем? Се ми гроб предлежит, се ми смерть предстоит. Суда Твоего, Господи, боюся, и муки безконечныя, злое же творя не престаю: Тебе Господа Бога моего всегда прогневляю, и Пречистую Твою Матерь, и вся небесныя Силы, и святаго Ангела хранителя моего. Вем убо, Господи, яко недостоин есмь человеколюбiя Твоего, но достоин есмь всякаго осужденiя и муки. Но, Господи, или хощу, или не хощу, спаси мя. Аще бо праведника спасаеши, ничтоже велiе: и аще чистаго помилуеши, ничтоже дивно: достойни бо суть милости Твоея, да не одолеет моя злоба Твоей неизглаголаннейшей благости и милосердiю: и якоже хощеши, устрой о мне вещь.
И тако, хотяй возлещи на одре, глаголи сiе:
Просвети очи мои, Христе Боже, да не когда усну в смерть, да не когда речет враг мой: укрепихся на него.
Заступник души моея буди, Боже, яко посреде хожду сетей многих; избави мя от них, и спаси мя, Блаже, яко Человеколюбец.
Преславную Божiю Матерь, и святых ангел святейшую немолчно воспоим, сердцем и усты Богородицу сiю исповедающе, яко воистинну рождшую нам Бога воплощенна, и молящуюся непрестанно о душах наших.
Также целуй крест твой, и знаменай крестом место твое от главы и до ног, также и от всех стран, глаголя молитву Честному Кресту:
Да воскреснет Бог, и расточатся врази Его, и да бежат от лица Его ненавидящiи Его: яко исчезает дым, да исчезнут, яко тает воск от лица огня, тако да погибнут беси от лица любящих Бога, и знаменующихся крестным знаменiем, и в веселiи глаголящих: радуйся, пречестный и животворящiй Кресте Господень, прогоняяй бесы силою на тебе пропятаго Господа нашего Iисуса Христа, во ад сшедшаго и поправшаго силу дiаволю, и даровавшаго нам Тебе, Крест Свой честный, на прогнанiе всякаго супостата. О пречестный и животворящiй Кресте Гсоподень, помогай ми со Святою Госпожею Девою Богородицею,и со всеми святыми во веки, аминь.
Или:
Огради мя, Господи, силою честнаго и животворящаго Твоего креста и сохрани мя от всякаго зла.
Также, вместо прощенiя:
Ослаби, остави, прости, Боже, прегрешенiя наша вольная и невольная, яже в слове и в деле, яже в веденiи и не в веденiи, яже во дни и в нощи, яже во уме и в помышленiи: вся нам прости яко Благ и человеколюбец.
Молитва
Ненавидящих и обидящих нас прости, Господи Человеколюбче. Благотворящим благосотвори. Братiям и сродникам нашим даруй яже ко спасенiю прошенiя и жизнь вечную: в немощех сущiя посети, и изцеленiе даруй. Иже на мори управи. С путешествующим спутешествуй. Православным христiанам споборствуй. Служащим и милующим нас грехов оставленiе даруй. Заповедавших нам, недостойным, молитися о них помилуй по велицей Твоей милости. Помяни, Господи, прежде усопших отец и братiй наших, и упокой их, идеже присещает свет лица Твоего. Помяни, Господи, братiй наших плененных и избави я от всякаго обстоянiя. Помяни, Господи, плодоносящих и доброделающих во святых Твоих церквах, и даждь им яже ко спасенiю прошенiя и жизнь вечную. Помяни, Господи, и нас, смиренных, и грешных и недостойных раб Твоих, и просвети наш ум светом разума Твоего, и настави нас на стезю заповедей Твоих: молитвами Пречистыя Владычицы нашея Богородицы и Приснодевы Марiи, и всех Твоих святых, яко благословен еси во веки веков, аминь.
Исповеданiе грехов повседневное
Исповедаю Тебе Господу Богу моему и Творцу, во Святей Троице единому, славимому и поклоняемому Отцу, и Сыну, и Святому Духу, вся моя грехи, яже содеях во вся дни живота моего, и на всякiй час, и в настоящее время, и в прешедшiе дни и нощи, делом, словом, помышленiем, объяденiем, пiанством, тайнояденiем, празднословiем, унынiем, леностью, прекословiем, непослушанiем, оклеветанiем, самолюбiем, многостяжанiем, хищенiем, неправдоглаголанiем, скверноприбытчеством, мшелоимством, ревнованiем, завистью, гневом, памятозлобiем, ненавистью, лихоимством и всеми моими чувствы: зренiем, слухом, обонянiем, вкусом, осязанiем и прочими моими грехи, душевными вкупе и телесными, имиже Тебе Бога моего и Творца прогневах и ближняго моего онеправдовах: о сих жалея, винна себе Тебе Богу моему представляю и имею волю каятися: точiю Ти Господи Боже мой, помози ми, со слезами смиренно молю Тя: прешедшая же согрешенiя моя милосердiем Твоим прости ми, и разреши от всех сих яже изглаголах пред Тобою, яко Благ и Человеколюбец.
Егда предаешися сну, глаголи: В руци Твои, Господи Iисусе Христе, Боже мой, предаю дух мой. Ты же мя благослови, Ты мя помилуй и живот вечный даруй ми. Аминь.
*** *** ***
Дополнительные Молитвы
Bеликопостная Молитва
Господи и Владыко живота моего, дух праздности, унынiя, любоначалiя и празднословiя не даждь ми. (Земной поклон).
Дух же целомудрiя, смиренномудрiя, терпенiя и любве даруй ми, рабу Твоему. (Земной поклон).
Ей, Господи, Царю, даруй ми зрети моя прегрешенiя и не осуждати брата моего, яко благословен еси во веки веков. Аминь. (Земной поклон).
Тропарь святому Николаю Чудотворцу
Правило веры и образ кротости, воздержанiя учителя яви тя стаду твоему, яже вещей истина: сего ради стяжал еси смиренiем высокая, нищетою богатая. Отче священноначальниче Николае, моли Христа Бога спастися душам нашим.
Символ веры
Верую во единаго Бога Отца, Вседержителя, Творца небу и земли, видимым же всем и невидимым.
И во единаго Господа Iисуса Христа, Сына Божiя, Единороднаго, Иже от Отца рожденнаго прежде всех век. Света от Света, Бога истинна от Бога истинна, рожденна, не сотворенна, едино–сущна Отцу, Имже вся быша. Нас ради человек и нашего ради спасенiя сшедшаго с Небес и воплотившагося от Духа Свята и Марiи Девы, и вочеловечшася. Распятаго же за ны при Понтiйстем Пилате, и страдавша, и погребена. И воскресшаго в третiй день по Писанiем. И возшедшаго на Небеса, и седяща одесную Отца. И паки грядущаго со славою судити живым и мертвым, Его же Царствiю не будет конца.
И в Духа Святаго, Господа, животворящаго, Иже от Отца исходящаго, Иже со Отцем и Сыном спокланяема и сславима, глаголавшаго пророки.
Во едину, святую, соборную и апостольскую Церковь. Исповедую едино крещенiе во оставленiе грехов. Чаю воскресенiя мертвых, И жизни будущаго века. Аминь.
1. Аз есмь Господь Бог твой. Да не будут тебе бози инiи, разве Мене. 2. Не сотвори себе кумира, и всякаго подобiя, елика на небеси горе, и елика на земли низу, и елика в водах под землею, да не поклонишися им, ни послужиши им. 3. Не возмеши имени Господа Бога твоего всуе. 4. Помни день субботннй, еже святити его: шесть дней делай, и сотвориши (в них). вся дела твоя. В день же седьмый — суббота, Господу Богу твоему.
5. Чти отца твоего и матерь твою, да благо ти будет, и да долголетен будеши на земли. 6. Не убiй. 7. Не прелюбы сотвори. 8. Не укради. 9. Не послушествуй на друга твоего свидетельства ложна. 10. Не пожелай жены искренняго твоего, не пожелай дому ближняго твоего, ни села его, ни раба его, ни рабыни его, ни вола его, ни осла его, ни всякаго скота его, ни всего елика суть ближняго твоего.
Девять Заповдей Блаженства
1. Блажени нищiи духом, яко тех есть Царство Небесное. 2. Блажени плачущiи, яко тiи утешатся. 3. Блажени кротцыи, яко тiи наследят землю. 4. Блажени алчущiи и жаждущiи правды, яко тiи насытятся. 5. Блажени милостивiи, яко тiи помиловани будут. 6. Блажени чистiи сердцем, яко тiи Бога узрят. 7. Блажени миротворцы, яко тiи сынове Божiи нарекутся. 8. Блажени изгнани правды ради, яко тех есть Царство Небесное. 9. Блажени есте, егда поносят вам, и ижденут, и рекут всяк зол глагол на вы, лжуще Мене ради. Радуйтеся и веселитеся, яко мзда вашя многа на небесех.
*** *** ***
Святому Причащенiю
Молитва св. Василiя Великаго
Владыко Господи Iисусе Христе, Боже наш, источниче жизни и безсмертiя, всея твари видимыя и невидимые Содетелю, безначальнаго Отца соприсносущный Сыне и собезначальный: премногiя ради благости, в последнiе дни в плоть оболкiйся, и распныйся, и погребыйся за ны неблагдарныя и злонравныя, и Твоею кровiю обновивый растлевшее грехом естество наше: Сам, Безсмертный Царю, прiими и мое грешнаго покаянiе, и приклони ухо Твое мне, и услыши глаголы моя. Согреших бо, Господи, согреших на небо и пред Тобою, и несмь достоин воззрети на высоту славы Твоея, прогневах бо Твою благость, Твоя заповеди преступив, и не послушав Твоих повеленiй. Но Ты, Господи, незлобив сый, долготерпелив же и многомилостив, не предал еси мя погибнути со беззаконьми моими, моего всячески ожидая обращенiя. Ты бо рекл еси, Человеколюбче, пророком Твоим: яко хотенiем не хощу смерти грешника, но еже обратитися и живу быти ему. Не хощеши бо, Владыко, созданiя Твоею руку погубити, ниже благоволиши о погибели человечестей, но хочеши всем спастися, и в разум истины прiити.
Тем же и аз, аще и недостоин есмь небесе и земли, и сея привременныя жизни, всего себя повинув греху, и сластем поработив, и Твой осквернив образ, но творенiе и созданiе Твое быв, не отчаяваю своего спасенiя окаянный, но Твое же безмерное благоутробiе дерзая прихожду. Прiими убо и мене, Человеколюбче Господи, якоже блудницу, яко разбойника, яко мытаря и яко блуднаго: и возми мое тяжкое бремя грехов, грех вземляй мира, и немощи человеческiе исцеляяй, труждающiяся и обремененные к Себе призываяй и упокоеваяй, не пришедый призвати праведные, но грешные на покаянiе и очисти мя от всякiе скверны плоти и духа, и научи мя совершати святыню во страсе Твоем, яко да чистым сведенiем совести моея, святынь Твоих часть прiемля, соединюся святому Телу Твоему и Крови, и имею Тебе во мне живуща и пребывающа, Со Отцем, и Святым Твоим Духом. Ей, Господи Iисусе Христе, Боже мой! И да не в суд ми будет причастiе пречистых и животворящих Таин Твоих, ниже да немощен буду душею же и телом, от еже недостойне тем причащатися, но даждь ми, даже до конечнаго моего издыханiя, неосужденно воспрiимати часть святынь Твоих, в Духа Святаго общенiе, в напутiе живота вечнаго, и во благопрiятен ответ на страшнем судищи Твоем: яко да и аз со всеми избранными Твоими общник буду нетленных Твоих благ, яже уготовал еси любящим Тя, Господи, в нихже препрославлен еси во веки. Аминь,
Молитва св. Iоанна Златоустаго
Господи, Боже мой, вем, яко несмь достоин, ниже доволен, да под кров внидеши храма души моея, занеже весь пуст и пался есть, и не имаши во мне места достойна, еже главу подклонити: но якоже с высоты нас ради смирил еси Себе, смирися и ныне смиренiю моему, и якоже воспрiял еси в вертепе и в яслех безсловесных возлещи, сице воспрiими и в яслех бессловесные моея души, и во оскверненное мое тело внити. И якоже не неудостоил еси внити, и свечеряти со грешники в дому Симона прокаженнаго, тако изволи внити и в дом смиренныя моея души, прокаженныя и грешныя, и якоже не отринул еси подобную мне блудницу и грешную, пришедшую и прикоснувшуюся Тебе, сице умилосердися и о мне, грешнем, приходящем и прикасающемтися, и якоже не возгнушался еси скверных ея уст и нечистых, целующих Тя, ниже моих возгнушайся сквернших оныя уст и нечистших, и сквернаго и нечистейшего моего языка. Но да будет ми угль пресвятаго Твоего Тела и честныя Твоея Крове, во освященiе, и просвещенiе и здравiе смиренней моей души и телу, во облегченiе тяжестей многих моих согрешенiй, в соблюденiе от всякаго дiавольскаго действа, во отгнанiе и возбраненiе злаго моего и лукаваго обычая, во умерщвленiе страстей, в снабденiе заповедей Твоих, в приложенiе Божественныя Твоея благодати, и Твоего Царствiя присвоенiе. Не бо яко презираяй прихожду к Тебе, Христе Боже, но яко дерзая на неизреченную Твою благость, и да не на мнозе удаляяйся общенiя Твоего, от мысленнаго волка звероуловлен буду.
Темже моюся Тебе: яко един сый Свят, Владыко, освяти мою душу и тело, ум и сердце, чревеса и утробы, и всего мя обнови, и вкорени страх Твой во удесех моих, и освященiе Твое неотемлемо от мене сотвори, и буди ми помощник и заступник, окормляя в мире живот мой, сподобляя мя и одесную Тебе предстоянiя со святыми Твоими, молитвами и моленьми Пречистыя Твоея Матери, невещественных Твоих служителей и пречистых сил, и всех святых, от века Тебе благоугодивших. Аминь.
Молитва св. Сvмеона Метафраста
Едине чистый и нетленный Господи, за неизреченную милость человеколюбiя наше все воспрiемый смешенiе, от чистых и девственных кровей, паче естества Рождшiя Тя, Духа Божественнаго нашествiем, и благоволенiем Отца присносущнаго, Христе Iисусе, премудросте Божiя и мире и сило: Твоим воспрiятiем животворящая и спасительная страданiя воспрiемый, крест, гвоздiя, копiе, смерть: умертви моя душетленныя страсти телесные. Погребенiем Твоим адова пленивый царствiя, погреби моя благими помыслы лукавая советованiя и лукавствiя духи разори. Тридневным Твоим и живоносным воскресенiем падшаго праотца восставивый, восстави мя грехом поползшагося, образы мне покаянiя предлагая. Преславным Твоим вознесенiем плотское обоживый воспрiятiе, и сiе десным Отца седенiем почтый, сподоби мя причастiем святых Твоих Таин десную часть спасаемых получити. Снитiем Утешителя Твоего Духа сосуды честны священные Твоя ученики соделавый, прiятелище и мене покажи Того пришествiя. Хотяй паки прiити судити вселенней правдою, благоволи и мне усрести Тя на облацех, Судiю и Создателя моего со всеми святыми Твоими, да бесконечно славословлю и воспеваю Тя, со безначальным Твоим Отцем, и Пресвятым и благим и животворящим Твоим Духом, ныне, и присно, и во веки веков. Аминь.
Молитва преподобнаго Iоанна Дамаскина
Владыко Господи Iисусе Христе Боже наш, едине имеяй власть человеком оставляти грехи, яко благ и Человеколюбец презри моя вся в веденiи и не в веденiи прегрешенiя: и сподоби мя неосужденно причаститися Божественных, и преславных, и пречистых и животворящих Твоих Таин, не в тяжесть, ни в муку, ни в приложенiе грехов: но во очищенiе, и освященiе, и обрученiе будущаго живота и Царствiя, в стену и помощь, и в возраженiе сопротивных, во истребленiе многих моих согрешенјй. Ты бо еси Бог милости, и щедрот, и человеколюбiя, и Тебе славу возсылаем, со Отцем, и Святым Духом, ныне и присно, и во веки веков. Аминь.
Молитва св. Василiя Великаго
Вем, Господи, яко недостойне причащаюся пречистаго Твоего Тела и честныя Твоея Крове, и повинен есмь и суд себе ям и пiю, не разсуждая Тела и Крове Тебе Христа и Бога моего: но на щедроты Твоя дерзая прихожду к Тебе рекшему: ядый Мою Плоть, и пiяй Мою Кровь, во Мне пребывает, и Аз в нем. Умилосердися убо, Господи, и не обличи мя грешнаго, но сотвори со мною по милости Твоей: и да будут ми святая сiя во исцеленiе, и очищенiе, и просвещенiе, и сохраненiе, и спасенiе, и во освященiе души и тела: во отгнанiе всякаго мечтанiя, и лукаваго деянiя, и действа дiавольскаго, мысленне во удесех моих действуемаго, в дерзновенiе и любовь яже к Тебе: во исправленiе житiя и утвержденiе, в возращенiе добродетели и совершенства: во исполненiе заповедей, в Духа Святаго общенiе, в напутiе живота вечнаго, во ответ благопрiятен на страшнем судищи Твоем: не в суд или во осужденiе.
Молитва св. Иоанна Златоустаго
Боже, ослаби, остави, прости ми согрешенiя моя, елика Ти согреших, аще словом, аще делом,аще помышленiем, волею или неволею, разумом или неразумiем, вся ми прости яко благ и Человеколюбец. И молитвами Пречистыя Твоея Матери, умных Твоих служителей и святых сил, и всех святых, от века Тебе благоугодивших, неосужденно благоволи прiяти ми святое и пречистое Твое Тело и честную Кровь, во исцеленiе души же и тела, и во очищенiе лукавых моих помышленiй. Яко Твое есть Царство и сила и слава, со Отцем и Святым Духом, ныне и присно, и во веки веков. Аминь.
Молитва того же
Несмь доволен, Владыко Господи, да внидеши под кров души моея: но понеже хощеши Ты, яко Человеколюбец жити во мне, дерзая приступаю: повелеваеши, да отверзу двери, яже Ты един создал еси, и внидеши со человеколюбiем якоже еси, внидеши и просвещаеши помраченный мой помысл: верую, яко сiе сотвориши: не бо блудницу, со слезами пришедшую к Тебе, отгнал еси: ниже мытаря отвергл еси покаявшася: ниже разбойника, познавша Царство Твое, отгнал еси: ниже гонителя покаявшася оставил еси, еже бе: но от покаянiя к Тебе пришедшыя вся, в лице Твоих другов вчинил еси, Един сый благословенный всегда, ныне и в безконечныя веки. Аминь.
Молитва того же
Господи Iисусе Христе, Боже мой, ослаби, остави, очисти и прости ми, грешному, и непотребному, и недостойному рабу Твоему прегрешенiя, и согрешенiя, и грехопаденiя моя, елика Ти от юности моея, даже до настоящаго дне и часа согреших: аще в разуме и в неразумiи, аще в словесех или делех, или помышленiях и мыслех, и начинанiях, и всех моих чувствах. И молитвами безсеменно рождшiя Тя, Пречистыя и Приснодевы Марiи, Матере Твоея, единыя непостыдныя недежды и предстательства и спасенiя моего, сподоби мя неосужденно причаститися пречистых, безсмертных, животворящих и страшных Твоих Таинств, во оставленiе грехов и в жизнь вечную: в освященiе и просвещенiе, крепость, исцеленiе, и здравiе души же и тела, и в потребленiе и всесовершенное погубленiе лукавых моих помыслов, и помышленiй, и предпрiятiй, и нощных мечтанiй, темных и лукавых духов: яко Твое есть Царство, и сила, и слава, и честь, и поклоненiе, со Отцем и Святым Твоим Духом, ныне и присно, и во веки веков. Аминь.
Молитва преп. Iоанна Дамаскина
Пред дверьми храма Твоего предстою, и лютых помышленiй не отступаю: но Ты, Христе Боже, мытаря оправдивый, и Хананею помиловавый, и разбойнику рая двери отверзый, отверзи ми утробы человеколюбiя Твоего, и прiими мя приходяща и прикасающася Тебе, яко блудницу, и кровоточивую: ова убо края ризы Твоея коснувшися, удобь исцеленiе прiят: ова же пречистеи Твои нозе удержавши, разрешенiе грехов понесе. Аз же, окаянный, все Твое Тело дерзая воспрiяти, да не опален буду: но прiими мя, якоже оныя, и просвети моя душевныя чувства, попаляя моя греховныя вины, молитвами безсеменно Рождшiя Тя и небесных сил, яко благословен еси во веки веков. Аминь.
Молитва св. Iоанна Златоустаго, читаемая в храме
Верую, Господи, и исповедую, яко Ты еси воистинну Христос, Сын Бога живаго, пришедый в мир грешныя спасти, от нихже первый есмь аз. Еще верую, яко сiе есть самое пречистое Тело Твое, и сiя есть самая честная Кровь Твоя. Молюся убо Тебе: помилуй мя и прости ми прегрешенiя моя, вольная и невольная, яже словом, яже делом, яже веденiем и неведенiем, и сподоби мя неосужденно причаститися пречистых Твоих Таинств во оставленiе грехов и в жизнь вечную. Аминь.
Вечери Твоея тайныя днесь, Сыне Божiй, причастника мя прiими: не бо врагом Твоим тайну повем, ни лобзанiя Ти дам, яко Iуда, но яко разбойник, исповедаю Тя: помяни мя, Господи, во Царствiи Твоем! Да не в суд или осужденiе будет мне причащенiе пречистых Твоих Таин, Господи, но во исцеление души и тела. Аминь.
Молитвы по
Святом Причащенiи
Слава Тебе, Боже; Слава Тебе, Боже; Слава Тебе, Боже.
Молитва
Благодарю Тя, Господи Боже мой, яко не отринул мя еси грешнаго, но общника мя быти святынь Твоих сподобил еси. Благодарю Тя, яко мене недостойнаго причаститися пречистых Твоих и небесных Даров сподобил еси. Но, Владыко Человеколюбче, нас ради умерый же и воскресый, и даровавый нам страшная сiя и животворящая Таинства, во благодеянiе и освященiе душ и телес наших: даждь быти сим и мне во исцеленiе души же и тела, во отгнанiе всякаго сопротивнаго, в просвещенiе очiю сердца моего, в мир душевных моих сил, в веру непостыдну, в любовь нелицемерну, во исполненiе премудрости, в соблюденiе заповедей Твоих, в приложенiе Божественныя Твоея благодати, и Твоего Цартвiя присвоенiе: да во святыни Твоей теми сохраняем, Твою благодать поминаю всегда, и не ктому себе живу, но Тебе нашему Владыце и благодетелю: и тако сего житiя изшед о надежде живота вечнаго, в присносущный достигну покой, идеже празднующих глас непрестанный, и безконечная сладость, зрящих Твоего лица доброту неизреченную. Ты бо еси истинное желанје, и неизреченное веселiе любящих Тя, Христе Боже наш, и Тя поет вся тварь во веки. Аминь.
Молитва св. Василiя Великаго
Владыко Христе Боже, Царю веков и Содетелю всех, благодарю Тя о всех, яже ми еси подал благих, и о причащенiи пречистых и животворящих Твоих Таинств. Молю убо Тя, Блаже и Человеколюбче: сохрани мя под кровом Твоим и в сени крилу Твоею: и даруй ми чистою совестью, даже до последняго моего издыханiя достойно причащатися Святынь Твоих во оставленiе грехов и в жизнь вечную. Ты бо еси хлеб животный, источник святыни, Податель благих: и Тебе славу возсылаем со Отцем и Святым Духом, ныне и присно, и во веки веков. Аминь.
Молитва св. Сvмеона Метафраста
Давый пищу мне плоть Твою волею, огнь сый и опаляяй недостойныя, да не опалиши мене, Содетелю мой: паче же пройди во уды моя, во вся составы, во утробу, в сердце. Попали тернiе всех моих прегрешенiй. Душу очисти, освяти помышленiя. Составы утверди с костьми вкупе. Чувств просвети простую пятерицу. Всего мя спригвозди страху Твоему. Присно покрый, соблюди же и сохрани мя от всякаго дела и слова душетленнаго. Очисти и омый, и украси мя: удобри, вразуми, и просвети мя. Покажи мя Твое селенiе единаго Духа, и не ктому селенiе греха. Да яко Твоего дому, входом причащнiя, яко огня мене бежит всяк злодей, всяка страсть. Молитвенники Тебе приношу вся святыя, чиноначалiя же безплотных, Предтечу Твоего, премудрые Апостолы, к сим же Твою нескверную чистую Матерь, ихже мольбы Благоуттробне прiими, Христе мой, и сыном света соделай твоего служителя. Ты бо еси освященiе и единый наших, Блаже, душ и светлость: и Тебе лепоподобно, яко Богу и Владыце, славу вси возсылаем на всяк день.
Молитва иная
Тело Твое Святое, Господи Iисусе Христе, Боже наш, да будет ми в живот вечный, и Кровь Твоя честная во оставленiе грехов: буди же ми благодаренiе сiе в радость, здравiе и веселiе: в страшное же второе пришествiе Твое сподоби мя грешнаго стати одесную славы Твоея, молитвами Пречистыя Твоея Матере, и всех святых.
Молитва ко Пресвятой Богородице
Пресвятая Владычице Богородице, свете помраченныя моея души, надеждо, покрове, прибежище, утешенiе, радованiе мое, благодарю Тя, яко сподобила мя еси недостойнаго, причастника быти пречистаго Тела и честныя Крове Сына Твоего. Но рождшая истинный Свет, просвети моя умныя очи сердца. Яже источник безсмертiя рождшая, оживотвори мя умерщвленнаго грехом. Яже милостиваго Бога любоблагоутробная Мати, помилуй мя, и даждь ми умиленiе, и сокрушенiе в сердце моем, и смиренiе в мыслех моих, и воззванiе в плененiих помышленiй моих: и сподоби мя до последняго издыханiя неосужденно прiимати пречистых Таин освященiе во исцеленiе души же и тела. И подаждь ми слезы покаянiя и исповеданiя во еже пети и славити Тя во вся дни живота моего, яко благословенна и препрославленна еси во веки. Аминь.
Ныне отпущаеши раба Твоего, Владыко, по глаголу Твоему, с миром: яко видеста очи мои спасенiе Твое, еже еси уготовал пред лицем всех людей, свет во откровенiе языков и славу людей Твоих Израиля.
*** *** ***
Псалом 1-й
Блажен муж, иже не иде на совет нечестивых, и на пути грешных не ста, и на седалищи губителей не седе. Но в законе Господни воля его и в законе Его поучится день и нощь. И будет яко древо насажденное при исходищих вод, еже плод свой даст во время свое, и листь его не отпадет: и вся, елика аще творит, успеет.
Не тако нечестивiи, не тако: но яко прах, егоже возметает ветр от лица земли. Сего ради не воскреснут нечестивiи на суд, ниже грешницы в совет праведных. Яко весть Господь путь праведных, и путь нечестивых погибнеть.
Псалом 8-й
Господи Господь наш, яко чудно имя Твое по всей земли: яко взятся великолепiе Твое превыше небес. Из уст младенец и ссущих совершил еси хвалу, враг Твоих ради, еже разрушити врага и местника.
Яко узрю небеса, дела перст Твоих, луну и звезды, яже Ты основал еси. Что есть человек, яко помниши его, или сын человечь, яко посещаеши его? Умалил еси его малым чим от Ангел, славою и честiю венчал еси его. И поставил еси его над делы руку Твоею, вся покорил еси под нозе его: овцы и волы вся, еще же и скоты польскiя, птицы небесныя, и рыбы морскiя, преходящiя стези морскiя. Господи Господь наш, яко чудно имя Твое по всей земли!
Псалом 22-й
Господь пасет мя, и ничтоже мя лишит. На месте злачне, тамо всели мя, на воде покойне воспита мя. Душу мою обрати, настави мя на стези правды, имене ради Своего. Аще бо и пойду посреде сени смертныя, не убоюся зла, яко Ты со мною еси: жезл Твой и палица Твоея, та мя утешиста, Уготовал еси предо мною трапезу сопротив стужающым мне: умастил еси елеом главу мою, и чаша Твоя упоявающи мя, яко державна. И милость Твоя поженет мя вся дни живота моего: и еже вселитимися в дом Господень в долготу днiй.
Псалом 40-й
Блажен разумеваяй на нища и убога, в день лют избавит его Господь. Господь да сохранит его, и живит его, и да ублажит его на земли, и да не предаст его в руки врагов его: Господь да поможет ему на одре болезни его: все ложе его обратил еси в болезни его.
Аз рех: Господи, помилуй мя, исцели душу мою, яко согреших Ти. Врази мои реша мне злая: когда умрет и погибнет имя его. И вхождаше видети, всуе глаголаше сердце его, собра беззаконiе себе, исхождаше вон и глаголаше вкупе. На мя шептаху вси врази мои, на мя помышляху злая мне. Слово законопреступное возложиша на мя: еда спяй не приложит воскреснути. Ибо человек мира моего, на негоже уповах, ядый хлебы моя, возвеличи на мя запинанiе. Ты же, Господи, помилуй мя, и возстави мя, и воздам им. В сем познах, яко восхотел мя еси, яко не возрадуется враг мой о мне. Мене же за незлобiе прiял, и утвердил мя еси пред Тобою в век. Благословен Господь Бог Израилев от века и до века: буди, буди.
Псалом 50-й
Помилуй мя, Боже, по велицей милости Твоей и по множеству щедрот Твоих очисти беззаконiе мое. Наипаче омый мя от беззаконiя моего, и от греха моего очисти мя: яко беззаконiе мое аз знаю, и грех мой предо мною есть выну. Тебе единому согреших и лукавое пред Тобою сотворих: яко да оправдишися во словесех Твоих, и победиши внегда судити Ти. Се бо, в беззаконiих зачат есмь, и во гресех роди мя мати моя. Се бо, истину возлюбил еси: безвестная и тайная премудрости Твоея явил ми еси. Окропиши мя иссопом, и очищуся: омыеши мя, и паче снега убелюся. Слуху моему даси радость и веселiе: возрадуются кости смиренныя. Отврати лице Твое от грех моих и вся беззаконiя моя очисти.
Сердце чисто созижди во мне, Боже, и дух прав обнови во утробе моей. Не отвержи мене от лица Твоего и Духа Твоего Святаго не отими от мене. Воздаждь ми радость спасенiя Твоего и Духом Владычним утверди мя. Научу беззаконныя путем Твоим, и нечестивiи к Тебе обратятся. Избави мя от кровей, Боже, Боже спасенiя моего: возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожженiя не благоволиши. Жертва Богу дух сокрушен: сердце сокрушенно и смиренно Бог не уничижит.
Ублажи, Господи, благоволенiем Твоим Сiона, и да созиждутся стены Iерусалимскiя. Тогда благоволиши жертву правды, возношенiе и всесожегаемая: тогда возложат на олтарь Твой тельцы.
Псалом 89-й
Господи, прибежище был еси нам в род и род: Прежде даже горам не быти, и создатися земли и вселенней, и от века и до века Ты еси. Не отврати человека во смиренiе, и рекл еси: обратитеся, сынове человечестiи: яко тысяща лет пред очима Твоима, Господи, яко день вчерашнiй, иже мимо иде, и стража нощная. Уничиженiя их лета будут: утро яко трава мимоидет, утро процветет и прейдет: на вечер отпадет, ожестеет и изсхнет: яко исчезохом гневом Твоим, и яростiю Твоею смутихомся. Положил еси беззаконiя наша пред Тобою, век наш в просвещенiе лица Твоего. Яко вси днiе наши оскудеша, и гневом Твоим исчезохом: лета наша яко паучина поучахуся. Днiе лет наших, в нихже седмьдесят лет, аще же в силах, осмьдесят лет, и множае их труд и болезнь: яко прiиде кротость на ны, и накажемся. Кто весть державу гнева Твоего, и от страха Твоего ярость Твою изчести. Десницу Твою тако скажи ми, и окованныя сердцем в мудрости.
Обратися, Господи, доколе, и умолен буди на рабы Твоя. Исполнихомся заутра милости Твоея, Господи, и возрадовахомся, и возвеселихомся: во вся дни наша возвеселихомся: за дни в няже смирил ны еси, лета в няже видехом злая. И призри на рабы Твоя, и на дела Твоя, и настави сыны их: и буди светлость Господа Бога нашего на нас, и дела рук наших исправи на нас и дело рук наших исправи.
Псалом 90-й
Живый в помощи Вышняго, в крове Бога Небеснаго водворится. Речет Господеви: заступник мой еси и прибежище мое, Бог мой, и уповаю на Него. Яко Той избавит тя от сети ловчи и от словесе мятежна: плещьма Своима осенит тя, и под криле Его надеешися: оружiем обыдет тя истина Его. Не убоишися от страха нощнаго, от стрелы летящiя во дни, от вещи во тме преходящiя, от сряща и беса полуденнаго. Падет от страны твоея тысяща, и тма одесную тебе, к тебе же не приближится: обаче очима твоима смотриши, и воздаянiе грешников узриши. Яко Ты, Господи, упованiе мое: Вышняго положил еси прибежище твое. Не прiидет к тебе зло, и рана не приближится телеси твоему: яко Ангелом Своим заповесть о тебе, сохранити тя во всех путех твоих: на руках возмут тя, да не когда преткнеши о камень ногу твою: на аспида и василиска наступиши, и попереши льва и змiя. Яко на Мя упова, и избавлю и: покрыю и, яко позна имя Мое. Воззовет ко Мне, и услышу его: с ним Есмь в скорби, изму его, и прославлю его: долготою днiй исполню его, и явлю ему спасенiе Мое.
Псалом 102-й
Благослови, душе моя, Господа, и вся внутренняя моя имя святое Его. Благослови, душе моя, Господа, и не забывай всех воздаянiй Его: очищающаго вся беззаконiя твоя, исцеляющаго вся недуги твоя, избавляющаго от истленiя живот твой, венчающаго тя милостiю и щедротами, исполняющаго во благих желанiе твое: обновится яко орля юность твоя.
Творяй милостыни Господь, и судьбу всем обидимым, сказа пути своя Моисеови, сыновом Израилевым хотенiя Своя. Щедр и милостив Господь, долготерпелив и многомилостив. Не до конца прогневается, ниже во век враждует. Не по беззаконiем нашым сотворил есть нам, ниже по грехом нашим воздал есть нам. Яко по высоте небесней от земли, утвердил есть Господь милость Свою на боящихся Его. Елико отстоят востоцы от запад, удалил есть от нас беззаконiя наша. Якоже щедрит отец сыны, ущедри Господь боящихся Его. Яко Той позна созданiе наше, помяну, яко персть есмы.
Человек, яко трава, днiе его, яко цвет сельный, тако оцветет: яко дух пройде в нем, и не будет, и не познает ктому места своего. Милость же Господня от века и до века на боящихся Его: и правда Его на сынех сынов, хранящих завет Его и помнящих заповеди Его, творити я.
Господь на небеси уготова престол Свой, и Царство Его всеми обладает. Благословите Господа вси Ангели Его, сильнiи крепостiю, творящiи слово Его, услышати глас словес Его. Благословите Господа вся силы Его, слуги Его, творящiи волю Его.
Благословите Господа вся дела Его, на всяком месте владычества Его: благослови, душе моя, Господа!
Псалом 115-й
Веровах, темже возглаголах: аз же смирихся зело. Аз же рех во изступленiи моем: всяк человек ложь. Что воздам Господеви о всех, яже воздаде ми? Чашу спасенiя прiиму, и имя Господне призову: молитвы моя Господеви воздам пред всеми людьми Его.
Честна пред Господем смерть преподобных Его. О Господи, аз раб Твой, аз раб Твой, и сын рабыни Твоея: растерзал еси узы моя. Тебе пожру жертву хвалы, и во имя Господне призову: молитвы моя Господеви воздам пред всеми людьми Его: во дворех дому Господня, посреде тебе, Iерусалиме.
Псалом 120-й
Возведох очи мои в горы, отнюдуже прiидет помощь моя. Помощь моя от Господа, сотворшаго небо и землю. Не даждь во смятенiе ноги твоея, ниже воздремлет храняй тя: се не возремлет, ниже уснет Храняй Израиля. Господь сохранит тя, Господь покров твой на руку десную твою. Во дни солнце не ожжет тебе, ниже луна нощiю. Господь сохранит тя от всякаго зла, сохранит душу твою Господь: Господь сохранит вхожденiе твое и исхожденiе твое отныне и до века.
+++
